NG Kerk Bellville-Wes

Dien Christus Biddend Saam

Kennisgewings en nuus

Nuus van Ernst Toerien uit Rusland

 

Die stilte van hierdie kant beteken nie dat hier niks aan die gang is nie, of ons iewers agter tralies sit nie, maar net doodeenvoudig dat die lewe soort van weer normaal is; of te wel normaal is onder die nuwe realiteite.

So 3 weke terug kom hier nog ‘n gas aan (1 van vele wat ons die laaste maand gehad het waarvan 1 selfs fotos van ons Sondagoggend byeenkoms kom neem en toe verdwyn het). Nou of die ou gestuur was deur andere om nog informasie van ons te kom uitvind weet ek nie, maar 1 ding wat my opgeval het was dit wat hy gese het. Volgens hom kom hy van die Ooste (sowat 4500km oos van hier) en het hy hier kom werk soek. Maar omdat hy nie ‘n registrasie in die stad gehad het nie en boonop donker van kleur is kon hy of nie werk kry nie of het die werkgewers hom uitgebyt. Hy het toe maar besluit om huis toe te gaan en het toe kom vra of ons hom kan help om vir hom ‘n treinkaartjie te koop in die rigting van sy huis. Nou duidelik kon ek sien dat die ou nie drink nie en ook nie dwelms gebruik nie en ‘n redelike kennis van die Bybel het. Verder is hy letterlik net 1 dag ouer as ek. So wat het hy gese wat my so getref het.

Wel, volgens hom was hy al 3 dae in die stad op soek na Christene wat hom kon help. Hy het al vele kerke besoek en orals het almal hom weggewys sonder om eens met hom te probeer praat. Dit wys net dat nie net ons besoek word nie, maar al die kerke hier rondom ons en ook dat almal te bang is om te help. Dit het my net laat besluit dat ons nie uit vrees vir die regering ophou doen wat Christus vir ons gese het om te doen nie. Van daardie dag af gee ek persoonlik glad nie meer om vir wie kom kuier nie. Of hy nou gestuur is deur die staat of nie, hier moet hulle vir Christus sien en nie vrees nie.

Nie net die staat stuur mense nie; God doen dit ook. Hier het ‘n vrou opgedaag wat absoluut niks van die Bybel weet nie. Sy het verhoudingsprobleme met haar 23 jarige dogter en 21 jarige seun begin kry en toe vir haar suster gevra wat om te doen. Wel haar suster woon ‘n Presbiteriaanse kerk by in Kirghistan en het haar toe aangeraai om ‘n Presbiteriaanse kerk hier te soek om na te gaan. Dus verlede Donderdag het ek en sy ure sit en gesels en ek moes al my kennis van kinderwerk inspan om op ‘n baie basiese vlak haar deur die hele Bybel te neem. Nou ek het wel tydens ons gesprek baie dinge gese wat onder die nuwe wet verbode is, maar dit moes gese word. Haar naam is Bella en bid asb dat sy op Sondae die kerk sal begin bywoon. Op die oomblik is dit oes seisoen in die somertuine, so sy is op naweke dus buite die stad.

Verlede Donderdag het die staatsaanklaers ‘n vergadering gehad met belangstellende Christene in die stad. Tydens die vergadering het hulle verduidelik hoe hulle plaaslik die nuwe wette gaan interpreteer en dus toepas. Al wat ons uit dit alles gehoor het is dat ons sekere Russiese woorde van nou af net sal moet ophou gebruik. Soos 1 ou opgemerk het kan ‘n verkeerde woord of komma op die verkeerde plek nou vrek duur kos. 1 kerk in die noorde van ons provinsie is reeds onder die nuwe wet aangekla en beboet omdat hulle oormatig gevangeliseer het (hulle sonde was ‘n Christen kinderkamp wat hulle aangebied het). Van die goed wat kwytgeraak het is genoeg om jou hardop te laat lag. Bv indien jy nou ‘n Bybel aan iemand gee moet dit ‘n stempel inhe van jou kerk. Indien daar geen stempel in is nie kry jy ‘n boete van R2000 en jou kerk ‘n boete van R250,000. Indien jy egter ‘n Bybel uitgee met ‘n stempel in beteken dit jy doen evangelisasiewerk en dit is bestrafbaar weereens met R2000 vir jou en R250,000 vir die kerk. Die les is dus: moenie Bybels aan andere gee nie.

Ander nuus is:

Roeslan het tydens ‘n swempoging seergekry. Hy wou van ‘n kaai afspring, maar toe gly hy en stamp sy kop. 1 tand is uit en hy het sy lippe behoorlik gesny sodanig dat hy nou ‘n permanente merk rondom sy mond het. Na die dokters niks wou doen nie, buiten vir hom sê watter pynpille om te gebruik is hy darem nou weer beter en aan die werk.

Joera en Ljana het darem ook beide uiteindelik werk in dieselfde dorp en Angelina gaan dus na ‘n kleuterskool.

Nadja woon ook ‘n kleuterskool by al vir so ‘n paar weke so 3 ure per dag. Daar is nog nie plek vir haar in die kleuterskool nie dus deur ‘n spesiale vergunning van die hoof kan sy die 3 ure kom en saam met die ander kinders speel. Sy het ook ballet lesse begin neem en die geniet sy ook baie.

Nadja hou vir Betsie heel besig om haar altyd by die regte plekke te kry en vanaf Sondag begin sy weer Sondagskool klas aanbied. Bly bid maar vir haar Russies.

Die somer is verby (dit was ‘n buitengewone droee en vrek warm somer) en dus weer tyd vir baie kerkprogramme om voort gesit te word. Volgende week moet ek weer per trein St.Petersburg toe vir die jaarlikse Gereformeerde konferensie en ek sal dus 1 Sondag nie hier preek nie.

O ja, ons het ook ‘n kerk kamp oftewel ‘Christen ouers wat bymekaargekom het en vir hulle kinders laat saamspeel en eet het hier agter in ons tuin’ gehad (lw nie ‘n kamp nie! – hoop julle sien die sarkasme raak). Dit was ook heel suksesvol. En daar was ook heelwat ‘kinder rustye’ by ons huis in die dorpie.

Die maand was vol en die werk word gedoen. Die duiwel sal dit nooit regkry om God se kinders se monde toe te stop nie; selfs Abel se bloed het van die grond na God uitgeroep. Bid vir wysheid om te weet watter woorde om waar te gebruik; wat om waar te doen en hoe om dit te doen.

Ek wou ook iets oor ons finansies genoem het, maar omdat almal dit doen gaan ek maar stilbly daaroor. Sover het ons ‘n dak oor ons kop, brood om te eet en vrede met God - dit is al wat saak maak, met die belangrikste 1 van die 3 natuurlik vrede met God. Hierdie vrede bid ek ook vir julle almal toe maak nie saak julle omstadighede nie. Niemand kan Sy vrede van ons wegneem nie!

 
Baie Seën
Ernst en gesin

 
Nuus van Jimmy en Marlize Meyer uit Riemvasmaak

Goeiedag almal!
 

Dit is seker hoogtyd dat ons weer van ons laat hoor!  Met ons as gesin gaan dit goed.  Ons beleef God se seën op soveel vlakke, dat ons weet ons moet nog hier woon en werk.

Twee weke gelede het ons ons bakkie laat diens.  Die diens self het ons nogal ‘n paar rand gekos, want die bakkie raak oud en het die afgelope ruk kort-kort ietsie fout.  Hulle stel ons toe ook in kennis dat daar nog meer werk aan die bakkie gedoen moet word en dat Jimmy so min as moontlik grondpad met die bakkie moet ry anders kan daar groot skade kom.  Die kwotasie is toe  R5000 vir die werk en dit sluit nog nie die twee agterbande, wat ook vervang moet word, in nie.  Hande in die hare gee ons die probleem vir God.

Die volgende dag gaan stap ek en ‘n vriendin soos ons meeste oggende doen. Maar die oggend is ek lus vir ‘n ander roete en ons begin bergop stap na bo-Riemvasmaak se kant toe.  Ons het so ’n  halfuur gestap toe daar ‘n bakkie langs ons stilhou.  Die mense vra vriendelik wat ons hier doen.  Ons verduidelik dat ons hier naby bly en sendingwerk doen.  Die vrou glimlag en vertel dat sy en haar man net die oggend gebid het oor die pad wat hulle moes ry en gevra het  dat God iemand oor hul pad moet stuur.  Ek nooi hulle toe  vir koffie en hul kuier toe sommer die hele voormiddag by ons en nuwe vriendskappe word gevorm.  Drie ure later vertrek hulle en die man gee vir Jimmy ‘n handvol note.  Dit was nie genoeg om die bakkie te laat regmaak nie, maar net daar besef ons dat as God vreemde mense uit Tswane kan stuur om vir ons ‘n gedeelte van die bedrag te voorsien, Hy in die res ook  sal voorsien.  Jimmy bestel toe die onderdele in geloof, en maak ‘n afspraak vir die diens van die  bakkie.  Ons vertel vir niemand wat ons gedoen het nie en bid!  Ons loof God vir die voorsiening wat nog sal kom en Vrydagaand is daar ‘n boodskap op Jimmy se foon!  Die res van die geld is inbetaal!   Ons kon die onderdele en die werk aan die bakkie betaal!  Ons dien ‘n God van wonderwerke!

Die lusern- en varkprojek lê vir Jimmy na aan die hart.  Daar is tans 15 klein varkies  en ons wag vir nog 3 soggies om kleintjies te kry.  Ons het deur die winter God se hand op die varkies gesien.  Ten spyte daarvan dat baie mense gesê het ons sal nie die klein varkies deur die winter lewendig kan hou nie het nie een van hulle gevrek nie.   Alle eer aan Hom.  Die winter is verseker verby en saam met die hitte groei die lusern pragtig.

Die Bybelstudie- en omgeegroepe gaan ook goed aan.  Dit is so lekker en ‘n voorreg om saam met mense ‘n pad te stap en te sien hoe hulle geestelik groei.  Hou asb aan bid vir die groepe vir getroue bywoning.

Met Rentia gaan dit oor die algemeen goed.  Haar punte lyk goed.  Sy sukkel net met die wiskunde en dit maak haar soms bietjie negatief.  Haar huislike omstandighede is steeds nie goed nie.  Sy huur tans ‘n kamer by mense in Augrabies en ry dan daagliks met die bus skool toe.  Dit beteken dat sy nie altyd die ekstra klasse in die middae na skool  kan bywoon nie.  Sy betaal vir kos waar sy woon, maar soms is daar niks en as ons vir haar kos saamgee, eet almal in die huis daarvan.  Ons bid dat sy volgende jaar koshuis toe kan gaan. Bid asb vir haar dat sy sal volhard.

Ons het in die Julie vakansie ‘n klein uitreikspan van NG Kerk Drakenstein in die Paarl gehad.  Hulle het ons kom seën met die mooiste teëls wat in die kombuis en sitkamer gelê is en met veiligheidshekke.  Dit was ‘n goeie uitreik en heerlik om saam met die mense te kuier.   

Ons wil net weer vir almal wat vir ons bid en ondersteun baie dankie sê.  Ons weet ons is nie alleen op die sendingveld nie.

Liefde en groete,
Jimmy, Marlize en kids

 

Gebedsversoeke

Ons is op facebook